subū uThā.ūñ to piine ke biich khultī hai
koī galī mere siine ke biich khultī hai
tamām raat sitāre talāsh karte haiñ
vo chāñdnī kisī ziine ke biich khultī hai
tū dekhtā hai to tashkīl paane lagtā huuñ
mirī bisāt nagīne ke biich khultī hai
giraft-e-hosh nahīñ sahl dast-bardārī
girah ye saḳht qarīne ke biich khultī hai
kināra-e-mah-o-anjum jahāñ tilak bhī ho
ye raushnī isī jiine ke biich khultī hai
na bādbān koī aur na rūd-o-samt-o-sukūñ
to kis kī khīñch safīne ke biich khultī hai
rukūñ to dekh sakūñ āsmān kī khiḌkī
jo ek baar mahīne ke biich khultī hai
zarā sā aur bhī kiina ai kīna-parvar-e-jāñ
mirī nazar tire kiine ke biich khultī hai
ye kaun chhoḌ gayā hai maqām-e-asl 'naved'
ye kis kī baas dafīne ke biich khultī hai
subu uThaun to pine ke bich khulti hai
koi gali mere sine ke bich khulti hai
tamam raat sitare talash karte hain
wo chandni kisi zine ke bich khulti hai
tu dekhta hai to tashkil pane lagta hun
meri bisat nagine ke bich khulti hai
giraft-e-hosh nahin sahl dast-bardari
girah ye saKHt qarine ke bich khulti hai
kinara-e-mah-o-anjum jahan tilak bhi ho
ye raushni isi jine ke bich khulti hai
na baadban koi aur na rud-o-samt-o-sukun
to kis ki khinch safine ke bich khulti hai
rukun to dekh sakun aasman ki khiDki
jo ek bar mahine ke bich khulti hai
zara sa aur bhi kina ai kina-parwar-e-jaan
meri nazar tere kine ke bich khulti hai
ye kaun chhoD gaya hai maqam-e-asl 'nawed'
ye kis ki bas dafine ke bich khulti hai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
