swang bharta hun tere shahr mein saudai ka

svāñg bhartā huuñ tire shahr meñ saudā.ī kā

ki yahī haal hai andar se tamāshā.ī kā

bazm ke haal pe ab ham nahīñ kuḌhne vaale

intizāmāt meñ kyā daḳhl tamāshā.ī kā

ham to sau jhuuT bhī boleñ vo agar haath aa.e

koī Thekā to uThāyā nahīñ sachchā.ī kā

dil-e-ḳhūñ-gashta ko jā jā ke dikhā.eñ yaaro

shahr meñ kaam nahīñ lāla-e-sahrā.ī kā

log kahte haiñ havas ko bhī mohabbat jaise

naam paḌ jaa.e mujāhid kisī balvā.ī kā

ye nahīñ hai ki navāze na ga.e hoñ ham log

ham ko sarkār se tamġha milā rusvā.ī kā

un ko TuuTā huā dil ham bhī dikhā.eñge 'salīm'

koī pūchh aa.e vo kyā lete haiñ banvā.ī kā

swang bharta hun tere shahr mein saudai ka

ki yahi haal hai andar se tamashai ka

bazm ke haal pe ab hum nahin kuDhne wale

intizamat mein kya daKHl tamashai ka

hum to sau jhuT bhi bolen wo agar hath aae

koi Theka to uThaya nahin sachchai ka

dil-e-KHun-gashta ko ja ja ke dikhaen yaro

shahr mein kaam nahin lala-e-sahrai ka

log kahte hain hawas ko bhi mohabbat jaise

nam paD jae mujahid kisi balwai ka

ye nahin hai ki nawaze na gae hon hum log

hum ko sarkar se tamgha mila ruswai ka

un ko TuTa hua dil hum bhi dikhaenge 'salim'

koi puchh aae wo kya lete hain banwai ka