tamam KHaliyon mein aksar sunai deta hai

tamām ḳhaliyoñ meñ aksar sunā.ī detā hai

har ik jahān meñ mahshar sunā.ī detā hai

jo chhū ke dekhūñ to gardish kī tah meñ gardish hai

dharūñ jo kaan to mahvar sunā.ī detā hai

hazār mīloñ bichhī irtiqā kī miTTī par

badan meñ ab bhī samundar sunā.ī detā hai

lachaktī raat meñ sayyārgāñ kī chaap suno

jo mujh meñ jazb hai bāhar sunā.ī detā hai

zamīn phail ga.ī hai hamārī ruuh talak

jahāñ kā shor ab andar sunā.ī detā hai

zabāñ ke ġhaar se pahuñche sukūt tak to ab

ajiib lahjoñ meñ manzar sunā.ī detā hai

tamaddunoñ ke har āhañg kā tazād 'riyāz'

jo duur jā.ūñ to behtar sunā.ī detā hai

tamam KHaliyon mein aksar sunai deta hai

har ek jahan mein mahshar sunai deta hai

jo chhu ke dekhun to gardish ki tah mein gardish hai

dharun jo kan to mahwar sunai deta hai

hazar milon bichhi irtiqa ki miTTi par

badan mein ab bhi samundar sunai deta hai

lachakti raat mein sayyargan ki chap suno

jo mujh mein jazb hai bahar sunai deta hai

zamin phail gai hai hamari ruh talak

jahan ka shor ab andar sunai deta hai

zaban ke ghaar se pahunche sukut tak to ab

ajib lahjon mein manzar sunai deta hai

tamaddunon ke har aahang ka tazad 'riyaz'

jo dur jaun to behtar sunai deta hai