tilism-e-ishq tha sab us ka sath hone tak

tilism-e-ishq thā sab us kā saath hone tak

ḳhayāl-e-dard na aayā najāt hone tak

milā thā hijr ke raste meñ sub.h kī mānind

bichhaḌ gayā thā musāfir se raat hone tak

ajiib rañg ye bastī hai us kī nagrī bhī

har ek nahr ko dekhā furāt hone tak

vo is kamāl se khelā thā ishq kī baazī

maiñ apnī fat.h samajhtā thā maat hone tak

hai isti.āra ġhazal us se baat karne kā

yahī vasīla hai ab us se baat hone tak

maiñ us ko bhūlnā chāhūñ to kyā karūñ 'ādil'

jo mujh meñ zinda hai ḳhud merī zaat hone tak

tilism-e-ishq tha sab us ka sath hone tak

KHayal-e-dard na aaya najat hone tak

mila tha hijr ke raste mein subh ki manind

bichhaD gaya tha musafir se raat hone tak

ajib rang ye basti hai us ki nagri bhi

har ek nahr ko dekha furaat hone tak

wo is kamal se khela tha ishq ki bazi

main apni fath samajhta tha mat hone tak

hai istiara ghazal us se baat karne ka

yahi wasila hai ab us se baat hone tak

main us ko bhulna chahun to kya karun 'adil'

jo mujh mein zinda hai KHud meri zat hone tak