tere aasman ki zamin ho gaya hun

tire āsmāñ kī zamīñ ho gayā huuñ

huā huuñ to apne ta.iiñ ho gayā huuñ

milī hai jagah dil meñ thoḌī sī us ke

samajh lo ki gosha-nashīñ ho gayā huuñ

yahāñ par maiñ honā nahīñ chāhtā thā

magar hote hote yahīñ ho gayā huuñ

tire paañv paḌne se inkār kar duuñ

maiñ itnā to ḳhud-sar nahīñ ho gayā huuñ

jahāñ mujh ko hone se rokā thā us ne

nahīñ baaz aayā vahīñ ho gayā huuñ

makāñ jis kā naqsha abhī ban rahā hai

maiñ filhāl us kā makīñ ho gayā huuñ

tavajjoh kā tālib huuñ is tarah se bhī

agar aap kā nukta-chīñ ho gayā huuñ

buḌhāpe se aglī ye manzil hai koī

javāñ ho gayā huuñ hasīñ ho gayā huuñ

ise bhī 'zafar' merī himmat hī samjho

kahīñ ho na paayā kahīñ ho gayā huuñ

tere aasman ki zamin ho gaya hun

hua hun to apne tain ho gaya hun

mili hai jagah dil mein thoDi si us ke

samajh lo ki gosha-nashin ho gaya hun

yahan par main hona nahin chahta tha

magar hote hote yahin ho gaya hun

tere panw paDne se inkar kar dun

main itna to KHud-sar nahin ho gaya hun

jahan mujh ko hone se roka tha us ne

nahin baz aaya wahin ho gaya hun

makan jis ka naqsha abhi ban raha hai

main filhaal us ka makin ho gaya hun

tawajjoh ka talib hun is tarah se bhi

agar aap ka nukta-chin ho gaya hun

buDhape se agli ye manzil hai koi

jawan ho gaya hun hasin ho gaya hun

ise bhi 'zafar' meri himmat hi samjho

kahin ho na paya kahin ho gaya hun