tere jaur-o-jafa ka hum kabhi shikwa nahin karte

tire jaur-o-jafā kā ham kabhī shikva nahīñ karte

mohabbat jis se karte haiñ use rusvā nahīñ karte

hamāre sheva-e-taslīm kī bhī qadr kar tū kuchh

ki fariyād-o-fuġhāñ āh-o-bukā naala nahīñ karte

mohabbat meñ bhī ham me.aar kā kuchh paas rakhte haiñ

kisī hālat meñ bhī ḳhuddārī kā saudā nahīñ karte

mohabbat karne vāloñ kā alag ik apnā maz.hab hai

vo rāh-e-ishq meñ sūd-o-ziyāñ dekhā nahīñ karte

raqīboñ ko sar-e-mahfil jo baazū meñ biThāte haiñ

dil-āzārī mirī karte haiñ aap achchhā nahīñ karte

hai poshīda yahāñ bhī apnī izzat hī kā ik pahlū

kisī se bad-sulūkī kā tirī charchā nahīñ karte

gavārā ehtiyāt aisī mohabbat meñ hai 'ḳhushtar' ko

ki us ke naam se mansūb sher apnā nahīñ karte

tere jaur-o-jafa ka hum kabhi shikwa nahin karte

mohabbat jis se karte hain use ruswa nahin karte

hamare shewa-e-taslim ki bhi qadr kar tu kuchh

ki fariyaad-o-fughan aah-o-buka nala nahin karte

mohabbat mein bhi hum mear ka kuchh pas rakhte hain

kisi haalat mein bhi KHuddari ka sauda nahin karte

mohabbat karne walon ka alag ek apna mazhab hai

wo rah-e-ishq mein sud-o-ziyan dekha nahin karte

raqibon ko sar-e-mahfil jo bazu mein biThate hain

dil-azari meri karte hain aap achchha nahin karte

hai poshida yahan bhi apni izzat hi ka ek pahlu

kisi se bad-suluki ka teri charcha nahin karte

gawara ehtiyat aisi mohabbat mein hai 'KHushtar' ko

ki us ke nam se mansub sher apna nahin karte