tere suluk ka gham subh-o-sham kya karte

tire sulūk kā ġham sub.h-o-shām kyā karte

zarā sī baat pe jiinā harām kyā karte

ki be-adab kā bhalā ehtirām kyā karte

jo nāstik thā use rām-rām kyā karte

vo koī 'mīr' hoñ 'ġhālib' hoñ yā 'anīs'-o-'dabīr'

suḳhan-varī se baḌā koī kaam kyā karte

na niiñd āñkhoñ meñ baaqī na intizār rahā

ye haal thā to koī nek kaam kyā karte

mizāj meñ thā takabbur to harkatoñ meñ ġhurūr

phir aise shaḳhs ko ham bhī salām kyā karte

'ra.īs' ḳhū-e-vafā ne hameñ rulāyā hai

phir is chalan ko bhalā ham bhī aam kyā karte

tere suluk ka gham subh-o-sham kya karte

zara si baat pe jina haram kya karte

ki be-adab ka bhala ehtiram kya karte

jo nastik tha use ram-ram kya karte

wo koi 'mir' hon 'ghaalib' hon ya 'anis'-o-'dabir'

suKHan-wari se baDa koi kaam kya karte

na nind aankhon mein baqi na intizar raha

ye haal tha to koi nek kaam kya karte

mizaj mein tha takabbur to harkaton mein ghurur

phir aise shaKHs ko hum bhi salam kya karte

'rais' KHu-e-wafa ne hamein rulaya hai

phir is chalan ko bhala hum bhi aam kya karte