tu nahin hoga magar ye silsila rah jaega

tū nahīñ hogā magar ye silsilā rah jā.egā

tere hone kā tasavvur jā-ba-jā rah jā.egā

qurbatoñ kī raah se ho kar guzar jā.eñge ham

manziloñ par darmiyāñ bas fāsla rah jā.egā

kis ne sochā thā ki ye itnā hasīñ ik vāqi.a

ek din siine meñ ban kar hādsa rah jā.egā

rāh-e-dil ko rauñd kar aage nikal jā.eñge log

aañkh meñ uThtā ġhubār-e-qāfila rah jā.egā

maiñ kahīñ kho jā.ūñgā le kar nigāh-e-shuq-e-dīd

tū charāġh-e-husn le kar DhūñDhtā rah jā.egā

kyā yūñhī ḳhāmosh duniyā se guzar jā.eñge ham

kyā jo kahnā hai vo sab kuchh an-kahā rah jā.egā

jab kahīñ kuchh bhī nahīñ thā bas ḳhudā thā aur phir

jab kahīñ kuchh bhī na hogā bas ḳhudā rah jā.egā

tu nahin hoga magar ye silsila rah jaega

tere hone ka tasawwur ja-ba-ja rah jaega

qurbaton ki rah se ho kar guzar jaenge hum

manzilon par darmiyan bas fasla rah jaega

kis ne socha tha ki ye itna hasin ek waqia

ek din sine mein ban kar hadsa rah jaega

rah-e-dil ko raund kar aage nikal jaenge log

aankh mein uThta ghubar-e-qafila rah jaega

main kahin kho jaunga le kar nigah-e-shuq-e-did

tu charagh-e-husn le kar DhunDhta rah jaega

kya yunhi KHamosh duniya se guzar jaenge hum

kya jo kahna hai wo sab kuchh an-kaha rah jaega

jab kahin kuchh bhi nahin tha bas KHuda tha aur phir

jab kahin kuchh bhi na hoga bas KHuda rah jaega