wo ek shaKHs jo mahfil mein bolta tha bahut

vo ek shaḳhs jo mahfil meñ boltā thā bahut

sunā hai ahl-e-nazar se vo khokhlā thā bahut

ridā-e-shab se lipaT ke savād-e-shām ke baa'd

kisī ke baare meñ pahroñ maiñ sochtā thā bahut

abhī jo paas se nazreñ churā ke guzrā hai

ga.ī rutoñ meñ vahī mujh ko chāhtā thā bahut

us ajnabī ne bil-āḳhir palaT ke dekh liyā

tilismī shahr meñ koī pukārtā thā bahut

jo baat baat pe hañstā thā muskurātā thā

kise ḳhabar ki vahī dil meñ ro rahā thā bahut

kuchh aise ahl-e-junūñ bhī yahāñ se guzre the

ġhubār-e-rāh-e-vafā jin ko DhūñDhtā thā bahut

jo pūchhte ho mujhe tum ko yaad ho shāyad

koī nazar se tumhārī kabhī girā thā bahut

wo ek shaKHs jo mahfil mein bolta tha bahut

suna hai ahl-e-nazar se wo khokhla tha bahut

rida-e-shab se lipaT ke sawad-e-sham ke ba'd

kisi ke bare mein pahron main sochta tha bahut

abhi jo pas se nazren chura ke guzra hai

gai ruton mein wahi mujh ko chahta tha bahut

us ajnabi ne bil-aKHir palaT ke dekh liya

tilismi shahr mein koi pukarta tha bahut

jo baat baat pe hansta tha muskuraata tha

kise KHabar ki wahi dil mein ro raha tha bahut

kuchh aise ahl-e-junun bhi yahan se guzre the

ghubar-e-rah-e-wafa jin ko DhunDhta tha bahut

jo puchhte ho mujhe tum ko yaad ho shayad

koi nazar se tumhaari kabhi gira tha bahut