wo mahakta hai jo KHushbu ke hawalon ki tarah

vo mahaktā hai jo ḳhushbū ke havāloñ kī tarah

is ko rakkhā hai kitāboñ meñ gulāboñ kī tarah

vo jo ḳhvāboñ ke jazīre meñ nazar aatā hai

mere idrāk meñ rahtā hai kināroñ kī tarah

ban ke ehsās jo dhaḌkan se lipaT jaatā hai

saath rahtā hai mohabbat meñ ḳhayāloñ kī tarah

dekhnā ḳhvāb kī sūrat meñ nazar aa.egā

vo jo palkoñ pe chamaktā hai sitāroñ kī tarah

maiñ ne ḳhushbū ke libāde meñ jise chūmā thā

merī har saañs meñ shāmil hai vo phūloñ kī tarah

vo mire sher kā ik misra-e-tar ho jaise

gungunātī huuñ use aaj maiñ gītoñ kī tarah

itnī achchhī thī mulāqāt ki pahle din hī

dil meñ 'afroz' basāyā use sochoñ kī tarah

wo mahakta hai jo KHushbu ke hawalon ki tarah

is ko rakkha hai kitabon mein gulabon ki tarah

wo jo KHwabon ke jazire mein nazar aata hai

mere idrak mein rahta hai kinaron ki tarah

ban ke ehsas jo dhaDkan se lipaT jata hai

sath rahta hai mohabbat mein KHayalon ki tarah

dekhna KHwab ki surat mein nazar aaega

wo jo palkon pe chamakta hai sitaron ki tarah

main ne KHushbu ke libaade mein jise chuma tha

meri har sans mein shamil hai wo phulon ki tarah

wo mere sher ka ek misra-e-tar ho jaise

gungunati hun use aaj main giton ki tarah

itni achchhi thi mulaqat ki pahle din hi

dil mein 'afroz' basaya use sochon ki tarah