wo shaKHs to mujhe hairan karta jata tha

vo shaḳhs to mujhe hairān kartā jaatā thā

ki zaḳhm de ke mujhe un ko bhartā jaatā thā

darīcha kholte jo haath un meñ thī zanjīr

galī se ek musāfir guzartā jaatā thā

banā.e jaatā thā maiñ apne haath ko kashkol

so merī ruuh meñ ḳhanjar utartā jaatā thā

use malāl se taktī thiiñ gaañv kī galiyāñ

vo naġhma-gar jo siye lab guzartā jaatā thā

banā.e jaatā thā us ko hasīñ na jaane kaun

badan vo phuul na thā aur nikhartā jaatā thā

talāsh-e-zar meñ javāñ kuuch karte jaate the

'kamāl' gaañv kā sab husn martā jaatā thā

wo shaKHs to mujhe hairan karta jata tha

ki zaKHm de ke mujhe un ko bharta jata tha

daricha kholte jo hath un mein thi zanjir

gali se ek musafir guzarta jata tha

banae jata tha main apne hath ko kashkol

so meri ruh mein KHanjar utarta jata tha

use malal se takti thin ganw ki galiyan

wo naghma-gar jo siye lab guzarta jata tha

banae jata tha us ko hasin na jaane kaun

badan wo phul na tha aur nikharta jata tha

talash-e-zar mein jawan kuch karte jate the

'kamal' ganw ka sab husn marta jata tha