zad pe aa jaega jo koi to mar jaega

zad pe aa jā.egā jo koī to mar jā.egā

vaqt kā kaam guzarnā hai guzar jā.egā

ḳhud use bhī nahīñ ma.alūm hai manzil apnī

jaane vaale se na pūchho vo kidhar jā.egā

aaj añdherā hai to kal koī charāġh-e-ummīd

matla-e-vaqt pe sūraj sā nikhar jā.egā

is taraf aag kā dariyā hai udhar dār-o-rasan

dil vo dīvāna ki jā.egā magar jā.egā

koī manzil nahīñ baaqī hai musāfir ke liye

ab kahīñ aur nahīñ jā.egā ghar jā.egā

kū-e-qātil meñ tahī-dast ko jā miltī nahīñ

jo bhī jā.egā liye haath meñ sar jā.egā

kitnī tārīkī hai shahr-e-dil-o-jāñ par taarī

koī andāza nahīñ kaun kidhar jā.egā

ek gul-dasta banāyā thā pa-e-rāhat-e-jāñ

ab ye andesha hai har phuul bikhar jā.egā

ek din aisā bhī qismat se mile jab 'aslam'

raqs kartā huā mahbūb-nagar jā.egā

zad pe aa jaega jo koi to mar jaega

waqt ka kaam guzarna hai guzar jaega

KHud use bhi nahin malum hai manzil apni

jaane wale se na puchho wo kidhar jaega

aaj andhera hai to kal koi charagh-e-ummid

matla-e-waqt pe suraj sa nikhar jaega

is taraf aag ka dariya hai udhar dar-o-rasan

dil wo diwana ki jaega magar jaega

koi manzil nahin baqi hai musafir ke liye

ab kahin aur nahin jaega ghar jaega

ku-e-qatil mein tahi-dast ko ja milti nahin

jo bhi jaega liye hath mein sar jaega

kitni tariki hai shahr-e-dil-o-jaan par tari

koi andaza nahin kaun kidhar jaega

ek gul-dasta banaya tha pa-e-rahat-e-jaan

ab ye andesha hai har phul bikhar jaega

ek din aisa bhi qismat se mile jab 'aslam'

raqs karta hua mahbub-nagar jaega