zindagi ek KHwab hai ye KHwab ki tabir hai

zindagī ik ḳhvāb hai ye ḳhvāb kī tābīr hai

halqa-e-gesu-e-duniyā paañv kī zanjīr hai

kuchh nahīñ is ke sivā mere tasarruf meñ yahāñ

dil kā bas jitnā ilāqa dard kī jāgīr hai

putliyāñ āñkhoñ kī sākit ho ga.iiñ paḌhte hue

āsmāñ par kis zabāñ meñ jaane kyā tahrīr hai

mujh ko goyā.ī pe uksāyā thā dil ne ek baar

aaj tak hoñToñ pe qaa.em lazzat-e-taqrīr hai

ab na jaane kis taraf le jaa.eñ vahshī āñdhiyāñ

shāḳh se TuuTā huā pattā bahut dil-gīr hai

sab bahādur haiñ yahāñ zikr-e-ajal hone talak

buz-dilī is ko kahūñ yā ḳhuun kī tāsīr hai

zindagi ek KHwab hai ye KHwab ki tabir hai

halqa-e-gesu-e-duniya panw ki zanjir hai

kuchh nahin is ke siwa mere tasarruf mein yahan

dil ka bas jitna ilaqa dard ki jagir hai

putliyan aankhon ki sakit ho gain paDhte hue

aasman par kis zaban mein jaane kya tahrir hai

mujh ko goyai pe uksaya tha dil ne ek bar

aaj tak honTon pe qaem lazzat-e-taqrir hai

ab na jaane kis taraf le jaen wahshi aandhiyan

shaKH se TuTa hua patta bahut dil-gir hai

sab bahadur hain yahan zikr-e-ajal hone talak

buz-dili is ko kahun ya KHun ki tasir hai