زیر تبصرہ کتاب "نظیر نامہ" شمش الحق عثمانی کی مرتب کردہ ہے، جو بی اے اور ایم اے اردو کے طلبہ کی ضرورت کو ذہن میں رکھتے ہوئے مرتب کی گئی ہے۔ کتاب چار حصوں پر مشتمل ہے۔ پہلا حصہ میں نظیر کے سوانحی حالات پر اختصار کے ساتھ روشنی ڈالی گئی ہے، جس میں نظیر کی زندگی سے متعلق اہم معلومات درج ہیں، مذاہب کے حوالے سے مختصر گفتگو کی گئی ہے، نظیر کے متصوفانہ مزاج کا تذکرہ کیا گیا ہے، اور اس کی کیفیت واضح کی گئی ہے، اشعار سے دلائل بھی پیش کئے گئے ہیں، نظیر کی شاعری کا مختلف جہات سے مطالعہ کیا گیا۔ دوسرے حصہ میں نظیر کی شاعری کے مقام کا تعین کیا گیا ہے، ان کے عہد کی شاعری کا مطالعہ کیا گیا ہے، نظیر کی شاعری میں عوامی رنگ پر مدلل گفتگو کی گئی ہے۔ تیسرے حصہ میں نظیر کے مزاج و مذاق اور ان کی شخصیت کا حسن ظاہر کیا گیا ہے، ان کی شعری کائنات پر مدلل گفتگو کی گئی ہے۔ چوتھے حصہ میں ان کی نظموں کا انتخاب پیش کیا گیا ہے، کتاب میں شامل مضامین آسان انداز میں وقیع معلومات پیش کرتے ہیں۔