سبط احمد قمر کی ناول"اجڑے نگر کا چراغ"اس اجڑے نگر کی کہانی ہے جو کبھی ذی علم ،مہذب اور بارونق بستی تھی۔اودھ کی گنگا جمنی مجلسی تہذیب اور معاشرتی آداب میں رچا بسا یہ قصبہ ثقافت اسلامی کی سنجیدہ ورثہ دار اور اپنے اسلاف سے ملے ہوئے بلند پایہ اخلاق کا ایک وقیع و عظیم مرکز تھا۔سادات عظام و مشائخ کرام کے بزرگ عالموں سے آباد یہ تاریخی قصبہ اپنے باطن مکینوں کی طرح پاک بنیاد تھا۔جس کی سرزمین پر نحوست کا گذر نہ تھا ،لیکن زمانے کی گرد وپیش نے اسے ایک دن حرف غلط کی طرح مٹا کر عبرت ناک پستی میں ڈھکیل دیاتھا۔اس ناول میں ناول نگار نے مختلف کردار میر فدا حسین،ہادی، کرامت علی،مکی میاں ،بوڑھا قلم کار کے ذریعے اپنی طویل زندگی کے ہر شعبہ پر اثر انداز ہونے والے اور معائب و محاسن سے بھرے ان سب ہی واقعات و حوادث کو اکٹھا کر کے ایک ایسی کہانی ترتیب دی ہے۔جس کے مطالعہ کے بعد قاری خود یہ فیصلہ کرے گا کہ یہ اجڑانگر کہاں ہے اور اس اجڑے نگر کا چراغ ۔۔كون ہے ،یہ اجڑا نگر کیا ہے ۔