زیر نظر "اردو میں قومی شاعری کے سو سال" قومی نظموں کا انتخاب ہے۔ یہ نظمیں قومی شاعری اور حب الوطنی کے موضوع پر ہیں۔ یہ مجموعہ 1957ء میں منظر عام پر آیا۔ جس میں 1857 سے 1957 کے درمیان تحریر کردہ حب الوطنی کے جذبے سے معمور نظموں کو شامل کیا گیاہے۔ اس مجموعہ کی نظموں کے مطالعہ سے پتا چلتا ہے کہ آزادی کا جذبہ کس طرح بیدار ہوا، اور پھر یہ مختلف ادوار میں کس طرح شکلیں بدلتا رہا۔ اور اس بات کا بھی کہ اردو شاعری کے قومی تصورات و افکار کے جو ذخیرے گزشتہ سو برسوں میں جمع ہوتے رہے ہیں ان کو ادوار میں اس طرح سے تقسیم کیا جائے کہ ہماری تحریکات آزادی کی سمتوں اور رجحانوں کا درست پتا چل سکے۔ اسی لئے مرتب نے نظموں کو مختلف ادوار میں تقسیم کیا ہے۔ چنانچہ کتاب کو چھ ادوار میں تقسیم کیا گیا ہے۔ ہر دور سے ایسی نظموں کو منتخب کیا گیا ہے جو جدو جہد آزادی، حب الوطنی، قومی جذبے اور پیام آزادی کے احساسات و جذبات سے لبریز ہیں۔ اس کتاب کو علی جواد زیدی نے مرتب کیا ہے، جو خود ایک اچھے شاعر ہیں۔ اس لئے کتاب کا مطالعہ فائدہ سے خالی نہیں۔