درد کا شمار اردو کے کلاسیکی شاعروں میں ہوتا ہے۔زیر نظر کتاب خواجہ میر درد کی سوانح اور شاعری پر ایک اہم تحقیقی کام ہے جسے مصنف نےدرد کی شخصیت کو سمجھنے کے لیے نو ابواب میں تقسیم کیا ہے۔ اس کتاب میں میر درد کی شاعری پرمدلل انداز میں بحث کی گئی ہے اس کے علاوہ ان کی سوانح کو بھی واضح طور پر پیش کرنے کی کوشش کی ہے۔

نام وحید اختر، ڈاکٹر اور تخلص وحید ہے۔۱۲؍اگست ۱۹۳۵ء کو اورنگ آباد ،دکن میں پیدا ہوئے۔ ۱۹۵۴ء میں جامعہ عثمانیہ سے بی اے کیا اور ۱۹۵۶ء میں ایم اے کیا۔ ۱۹۶۰ء میں خواجہ میر درد کے تصوف پر تحقیقی مقالہ لکھ کر پی ایچ ڈی کی ڈگری حاصل کی۔ ان کی پہلی نظم ۱۹۴۹ء میں شائع ہوئی۔ان کی طبیعت کا رجحان نظم کی طرف زیادہ ہے ۔ ان کی تخلیقات ہندستان اور پاکستان کے معیاری رسالوں میں شائع ہوتی رہتی ہے۔طالب علمی کے زمانے میں اورنگ آباد کالج کے رسالہ ’’نورس‘‘ اور مجلہ’’عثمانیہ‘‘ کے مدیر رہ چکے ہیں۔ رسالہ ’’صبا‘‘ کی ادارت کے رکن کی حیثیت سے بھی کام کرتے رہے ۔ علی گڑھ یونیورسٹی میں صدر شعبۂ فلسفہ رہے۔ ’’پتھروں کا مغنی‘‘ کے نام سے ان کا کلام چھپ گیا ہے۔ ان کے دیگر شعری مجموعوں کے نام یہ ہیں:’’زنجیر کا نغمہ‘‘، ’’شب کا رزمیہ‘‘۔ بحوالۂ:پیمانۂ غزل(جلد دوم)،محمد شمس الحق،صفحہ:301