افسانہ نگار کا وژن علم و ادب کی خمیر سے تیار ہوتاہے۔ محترمہ صغریٰ مہدی صاحبہ کے 19 افسانوں پر مشتمل یہ مجموعہ "پیش گوئی: اور دوسرے افسانے" ان کا چوتھا افسانوی مجموعہ ہے۔ خواتین افسانہ نگاروں میں صغری مہدی کا ایک اہم مقام اس لئے بھی ہے کہ وہ ہمیشہ ہی عورت کی بہتر زندگی اور سماج میں ان کے مقام کے تئیں بیدار رہی ہیں۔ اس میں موجود افسانوں میں زندگی کے مختلف میدانوں میں انسانوں خصوصا خواتین کے مسائل کو اجاگر کیا گیا ہے۔ زیر تبصرہ افسانوی مجموعے کی پہلی کہانی 'پیش گوئی' ہے اس کے بعد علی الترتیب 'لبادہ، عجیب وغریب بستی، سراب، عزت، بزنس، آزادی، شیشے کا گھر، دوسرا رخ' وغیرہ افسانے ہیں۔ پیش لفظ نہایت مختصر مگر جامع ہے۔ صغریٰ مہدی کے افسانوں کے موضوعات زیادہ تر عورت اور اس کے مسائل کے گرد طواف کرتے ہیں۔ ان کے افسانے ان نقطوں کو اٹھاتے ہیں جہاں عورت آزاد نہیں ہے وہ کسی اور کی ملکیت ہے چاہے وہ باپ اور بھائی کی صورت میں ہو یا پھر شوہر اور سسرال کی۔ اس مجموعہ میں بھی ان موضوعات کو محسوس کیا جاسکتا ہے۔ اس مجموعے کے زیادہ تر افسانے آل انڈیا ریڈیو کی اردو سروس سے نشر ہوئے ہیں۔ مجموعی طور پر یہ افسانوی مجموعہ موضوعاتی، سماجی، سیاسی، مذہبی، اخلاقی اعتبار سے دلچسپی کا باعث ہے۔