زیر تبصرہ کتاب "سرمایہ تغزل" افسر صدیقی کا ایک طرح سے کلیات ہے، جس میں ان کے چاروں مجموعے 'برق تخیل، 'تابش خیال'، 'شہاب تخیل'، 'نوشتۂ بے مثال' شامل ہیں۔ اس میں غزلیں کثیر تعداد میں شامل ہیں، حمد اور نعت ہر مجموعہ کے شروع میں ہے۔ کتاب میں شامل غزلوں میں عشق، تصوف، کرامات عشق، محبوب کا سراپا، یاس، جیسے اہم موضوعات شامل ہیں، اخلاقی اقدار کی ترجمانی بھی غزلوں میں بخوبی کی گئی ہے، میر کی تقلید بھی ان کی شاعری میں نمایاں نظر آتی ہے۔ مجموعہ کے شروع میں "ادب کی قابل احترام اور منفرد شخصیت" کے عنوان سے توقیر صدیقی کا مضمون ہے، جس میں افسر صدیقی کی شخصیت کا مقام واضح کیا گیا ہے، دوسرا مضمون ڈاکٹر قمقام حسین جعفری کا "ہمہ جہت شاعر افسر صدیقی امروہوی "جس میں افسر صدیقی کے کلام کی وقعت کو ظاہر کیا گیا ہے، اور مختلف شعراء کے کلام سے افسر کے کلام کا تقابل کیا گیا ہے۔ افسر صدیقی ایک استاد شاعر ہونے کے ساتھ علم عروض کے بھی ماہر ہیں۔ تمام اصناف میں طبع آزمائی کی ہے۔