اردوکے مشہور و معروف شاعر فیض احمد فیض کی شخصیت اور کلام محتاج تعارف نہیں ہے۔سال 2011ء فیض کی صدی کی تقریبات کا سال رہا۔جس میں مختلف ادبا و شعرا نے فیض کی شخصیت اور شاعری کو مختلف انداز سے خراج تحسین پیش کی ہے۔فیض کی ادبی ،شعری خدمات کا اعتراف کیا۔ زیر مطالعہ کتاب " شیشوں کا مسیحا" اسی سلسلہ کی ایک کڑی ہے ۔جس کے مصنف اشفاق حسین ہیں۔ اشفاق حسین کو فیض سے ایک والہانہ لگاو ہے۔ انہوں نے فیض پر بہت کچھ لکھا بلکہ ان کو ماہر فیض سمجھنا چاہئے۔ "شیشوں کا مسیحا" فیض کے فن اور زندگی پر لکھی گئی پانچ کتابوں کا مجموعہ ہے۔ یہ پانچوں کتابیں اشفاق حسین نے لکھی ہیں۔ جن میں فیض شخصیت اور فن، فیض حبیب عنبر دست، فیض کے مغربی حوالے، فیض ایک جائزہ، فیض تنقید کی میزان پر، شامل ہیں۔ یہ سب کتابیں فیض کی بہتر تفہیم میں معاون ہیں۔

اشفاق حسین نام اورتخلص اشفاق ہے۔یکم جنوری ۱۹۵۱ء کو کراچی میں پیدا ہوئے۔ جیکب لائن گورنمنٹ ہائی اسکول سے ابتدائی تعلیم حاصل کی۔ بعد ازاں کراچی گورنمنٹ کالج، ناظم آباد، نیشنل کالج اور سلامیہ کالج سے تعلیمی منازل طے کرتے ہوئے جامعہ کراچی سے اردو میں ایم اے کیا۔ ملازمت کے سلسلے میں گورنمنٹ کالج، کورنگی، کراچی اور آرٹس کونسل، کراچی سے وابستہ رہے۔مارچ۱۹۸۰ء میں کینیڈا چلے گئے جہاں ان کی ٹریول ایجنسی ہے۔ کینیڈا سے’’اردوانٹرنیشنل‘‘ کا اجرا کیا جو ۱۹۸۲ء سے ۱۹۸۷ء تک جاری رہا۔ شاعری کے علاوہ انھوں نے تنقیدی مضامین بھی لکھے ہیں۔ ان کی تصانیف کے چند نام یہ ہیں: ’’ہم اجنبی ہیں‘‘(شعری مجموعے)، ’’فیض ایک جائزہ‘‘، ’’فیض کے مغربی حوالے‘‘(دوجلدوں میں)۔ کینیڈا سے کچھ نئی اور پرانی نظموں کا ترجمہ انگریزی میںThat Day Will Dawnکے نام سے شائع ہوا۔ بحوالۂ:پیمانۂ غزل(جلد دوم)،محمد شمس الحق،صفحہ:405