ایم۔ اسلم اردو زبان و ادب کے ایک ایسے تخلیق کار ہیں جنہوں نے زیادہ تر تاریخی ناول لکھے۔ یہ جان کر کسی کو بھی حیرت ہو سکتی ہے کہ وہ غالباً اردو کے واحد ایسے تخلیق کار ہوں گے کہ جن کی تخلیقات کا اگر تخمینہ لگایا جائے تو اس کی تعداد کم و بیش ایک لاکھ صفحات ہوگی۔ ان کا تعلق پاکستان کے لاہور سے تھا، چوں کہ ان کی پیدائش ایک معزز خاندان میں ہوئی تھی، اس لیے اقبال جو کہ اس وقت انہیں کے کالج میں فلسفے کے پروفیسر تھے، اسلم کو بڑا عزیز رکھتے تھے۔ یہی وجہ ہے ان کی تخلیقات پر مشرقی رنگ خاصا غالب ہے۔ زیر نظر کتاب سہاگ ان کا افسانوی مجموعہ بھی اسی بات کی تصدیق کرتا ہے جس میں انہوں نے مشرقی عورت کے مغربی تہذیب میں ملوث ہونے کے نقصان اور خسارے کو اپنا موضوع بنایا ہے۔

ایم اسلم 6 اگست، 1885ء کو لاہور کے ایک معزز خاندان میں پیدا ہوئے۔ ان کا اصل نام میاں محمد اسلم تھا۔ ان کے والد میاں نظام الدین ایک بزرگ اور نیک خصلت انسان تھے جنھوں نے قوم کی اصلاح و بہبود کے لیے اپنی زندگی وقف کر دی تھی۔ ایم اسلم نے گورنمنٹ کالج لاہور سے تعلیم حاصل کی۔ علامہ اقبال اس وقت فلسفہ کے پروفیسر تھے، وہ ایم اسلم کو عزیز رکھتے تھے۔ ان کے ادبی ذوق کی تربیت میں اقبال کا اہم کردار تھا۔ اقبال نے ہی ایم اسلم کو نثرنگاری کی جانب توجہ دلائی۔ ایم اسلم نے ادب کی تمام اصناف میں طبع آزمائی کی۔ ان کی ادبی زندگی کا آغاز شعر و شاعری سے ہوا لیکن انہوں نے تنقیدی مضامین اور افسانے لکھے، ناول میں تو ان کی ایک خاص شناخت بن گئی۔ ان کے افسانوں اور ناولوں میں رومان، تصور، تخیل، حقیقت، حزن و طرب نمایاں ہے۔ ان کے افسانوں میں ہندوستان کے دیہات اور شہروں کی زندگی کے علاوہ یورپ، مصر، روس، ترکستان، عرب، چین اور جاپان کے رسم و رواج اور باشندوں کے طور طریقے خاص طور پر دیکھے جا سکتے ہیں۔ انہوں نے 200 سے زائد ناول تحریر کیے۔ ان کے مشہور ناولوں فاطمہ کی آپ بیتی، عروس غربت، معرکۂ بدر، فتح مکہ، صبح احد، معاصرۂ یثرب، ابو جہل، جوئے خون، پاسبان حرم، شمشیر ستم، بنتِ حرم، غزالہ صحرا، فتنۂ تاتار، خون شہیداں، رقص ابلیس، مرزا جی، گناہ کی راتیں، رقص زندگی اور افسانوی مجموعوں میں صدا بصحرا، نغمہ حیات اور گنہگار سرِ فہرست ہیں ۔ اس کے علاوہ انہوں نے انگریزی سے ترجمے بھی کیے۔ پھر انہوں نے وارث شاہ کی شاہکار تخلیق ہیر رانجھا کا پنجابی زبان سے نہایت بہترین اردو ترجمہ بھی کیا۔