سہیل، علی گڑھ

جنوری 1926میں علی گڑھ سے سہیل کا اجراء ہوا۔ یہ انجمن اردوئے معلی مسلم یونو رسٹی علی گڑھ کا سہ ماہی علمی رسالہ تھا۔ پروفیسر رشید احمد صدیقی علیگ اس کے مدیر تھے۔ مجلہ سہیل کے اغراض و مقاصد میں ایک خاص بات یہ درج تھی کہ ’’سہیل کو ہر شاعر یا نثر نگار کی تالیف قلوب کا ذریعہ نہ بنانا‘‘ جب کہ آج عموماً زیادہ تر رسائل کی روش تالیف قلوب کی ہے۔ اسی وجہ سے معیاری تخلیقات کے فقدان کی شکایت عام ہوچکی ہے۔ سہیل کا معاملہ ذرا الگ طرح کا تھا کہ اس کی ادارت سے وابستہ پروفیسر رشید احمد صدیقی بالغ نظر تھے اور علوم و ادبیات پر ان کی گہری نظر بھی تھی۔ اس لئے سہیل میں قدروقعت مضامین ہی شائع ہوا کرتے تھے۔