bachche man ke sachche sare jag ki aankh ke tare

bachche man ke sachche saare jag kī aañkh ke taare

ye vo nanhe phuul haiñ jo bhagvān ko lagte pyāre

ḳhud rūTheñ ḳhud man jaa.eñ phir ham-jolī ban jaa.eñ

jhagḌā jis ke saath kareñ agle hī pal phir baat kareñ

in ko kisī se bair nahīñ in ke liye koī ġhair nahīñ

in kā bholā-pan miltā hai sab ko baañh pasāre

insāñ jab tak bachcha hai tab tak samjho sachchā hai

juuñ juuñ us kī umr baḌhe man par jhuuT kā mail chaḌhe

krodh baḌhe nafrat ghere lālach kī aadat ghere

bachpan in pāpoñ se haT kar apnī umr guzāre

tan komal man sundar haiñ bachche baḌoñ se behtar haiñ

in se chhūt aur chhāt nahīñ jhūTī zaat aur baat nahīñ

bhāshā kī takrār nahīñ maz.hab kī dīvār nahīñ

in kī nazroñ meñ ik haiñ mandir masjid gurudvāre

bachche man ke sachche sare jag ki aankh ke tare

ye wo nanhe phul hain jo bhagwan ko lagte pyare

KHud ruThen KHud man jaen phir ham-joli ban jaen

jhagDa jis ke sath karen agle hi pal phir baat karen

in ko kisi se bair nahin in ke liye koi ghair nahin

in ka bhola-pan milta hai sab ko banh pasare

insan jab tak bachcha hai tab tak samjho sachcha hai

jun jun us ki umr baDhe man par jhuT ka mail chaDhe

krodh baDhe nafrat ghere lalach ki aadat ghere

bachpan in papon se haT kar apni umr guzare

tan komal man sundar hain bachche baDon se behtar hain

in se chhut aur chhat nahin jhuTi zat aur baat nahin

bhasha ki takrar nahin mazhab ki diwar nahin

in ki nazron mein ek hain mandir masjid gurudware