a bulbul-e-KHush-lahn ye shirin suKHani dekh

a bulbul-e-ḳhush-lahn ye shīrīñ suḳhanī dekh

sad-rañg-e-qabā dekh mirī gul-badanī dekh

har mauj-e-sabā par bhī lachak jaa.e hai ai hai

ai shāḳh-e-gul-andām ye gul-rez-tanī dekh

dil kuufa kī mānind huā jaatā hai yārab

a mamba-e-rahmat za-nigāh-e-madanī dekh

vāqif hī nahīñ tū mirī tārīḳh se nāqid

ik baar palaT kar kabhī ḳhalq-e-hasnī dekh

dil lagtā hai bāhar se jo bosīda makāñ sā

dāḳhil to kabhī ho ke ye qasr-e-adnī dekh

a bulbul-e-KHush-lahn ye shirin suKHani dekh

sad-rang-e-qaba dekh meri gul-badani dekh

har mauj-e-saba par bhi lachak jae hai ai hai

ai shaKH-e-gul-andam ye gul-rez-tani dekh

dil kufa ki manind hua jata hai yarab

a mamba-e-rahmat za-nigah-e-madani dekh

waqif hi nahin tu meri tariKH se naqid

ek bar palaT kar kabhi KHalq-e-hasni dekh

dil lagta hai bahar se jo bosida makan sa

daKHil to kabhi ho ke ye qasr-e-adni dekh