aa gaya waqt ki ho dawat-e-am ai saqi

aa gayā vaqt ki ho dāvat-e-ām ai saaqī

bhej de chāroñ taraf apnā payām ai saaqī

khīñch lā.egā hazāroñ ko tire paas yahāñ

ye tirā husn-e-nazar husn-e-kalām ai saaqī

ghar luTāne kī nahīñ ghar ko bachāne kī hai fikr

kis qadar ishq hai merā abhī ḳhaam ai saaqī

kāsa-e-dil hai tire sāmne us ko bhar de

mai-e-añgūr to hai mujh pe harām ai saaqī

un se bachnā hai tire lutf-o-karam par mauqūf

haiñ rah-e-ishq meñ phaile hue daam ai saaqī

kab na.e nazm se duniyā ko milegī rāhat

kitnā mohlik hai ye farsūda nizām ai saaqī

duur goshe meñ hai uftāda-o-dil-gīr 'urūj'

aa kabhī us kī taraf bāda-ba-jām ai saaqī

aa gaya waqt ki ho dawat-e-am ai saqi

bhej de chaaron taraf apna payam ai saqi

khinch laega hazaron ko tere pas yahan

ye tera husn-e-nazar husn-e-kalam ai saqi

ghar luTane ki nahin ghar ko bachane ki hai fikr

kis qadar ishq hai mera abhi KHam ai saqi

kasa-e-dil hai tere samne us ko bhar de

mai-e-angur to hai mujh pe haram ai saqi

un se bachna hai tere lutf-o-karam par mauquf

hain rah-e-ishq mein phaile hue dam ai saqi

kab nae nazm se duniya ko milegi rahat

kitna mohlik hai ye farsuda nizam ai saqi

dur goshe mein hai uftada-o-dil-gir 'uruj'

aa kabhi us ki taraf baada-ba-jam ai saqi