aa jata hai KHud pas bulana nahin paDta

aa jaatā hai ḳhud paas bulānā nahīñ paḌtā

milne ke liye haath baḌhānā nahīñ paḌtā

kuchh aisī suhūlat se makīñ dil meñ huā vo

mujh ko bhī mirī zaat se jaanā nahīñ paḌtā

ye ḳhaas ri.āyat hai ki ab des meñ apne

ġham muft meñ miltā hai kamānā nahīñ paḌtā

is shahr se us shahr talak sīdhī saḌak hai

filhāl to raste meñ zamāna nahīñ paḌtā

afsāna-e-hastī bhī bahut ḳhuub hai jis meñ

kirdār koī sā bhī nibhānā nahīñ paḌtā

ik karb-e-musalsal ki mirā pahlū-nashīñ hai

ik lutf-e-darūñ jis ko gañvānā nahīñ paḌtā

ab lohā ugāte haiñ daraḳhtoñ kī jagah ham

koyal ko bhī ab shor machānā nahīñ paḌtā

aa jata hai KHud pas bulana nahin paDta

milne ke liye hath baDhana nahin paDta

kuchh aisi suhulat se makin dil mein hua wo

mujh ko bhi meri zat se jaana nahin paDta

ye KHas riayat hai ki ab des mein apne

gham muft mein milta hai kamana nahin paDta

is shahr se us shahr talak sidhi saDak hai

filhaal to raste mein zamana nahin paDta

afsana-e-hasti bhi bahut KHub hai jis mein

kirdar koi sa bhi nibhana nahin paDta

ek karb-e-musalsal ki mera pahlu-nashin hai

ek lutf-e-darun jis ko ganwana nahin paDta

ab loha ugate hain daraKHton ki jagah hum

koyal ko bhi ab shor machana nahin paDta