aa ke mahfil mein teri gham se kinara na hua

aa ke mahfil meñ tirī ġham se kinārā na huā

mujh sā duniyā meñ koī dard kā maarā na huā

āḳhir ashkoñ ne hī sab hāl-e-dil-e-zār kahā

kuchh zabāñ se mirī iz.hār kā yaarā na huā

ye kahā thā ki mire ghar meñ vo aa.eñ yak din

aa ga.e taish meñ shāyad ye gavārā na huā

kis tarah mere muqaddar kā sitārā chamke

un kī jānib se koī aisā ishārā na huā

Dar se tauhīn-e-mohabbat ke maiñ ḳhāmosh rahā

naam phir le ke pukārūñ ye gavārā na huā

dard-o-ġham jaur-o-sitam āh-o-fuġhāñ ranj-o-malāl

ye to sab mil ga.e 'nāzī' vo hamārā na huā

aa ke mahfil mein teri gham se kinara na hua

mujh sa duniya mein koi dard ka mara na hua

aaKHir ashkon ne hi sab haal-e-dil-e-zar kaha

kuchh zaban se meri izhaar ka yara na hua

ye kaha tha ki mere ghar mein wo aaen yak din

aa gae taish mein shayad ye gawara na hua

kis tarah mere muqaddar ka sitara chamke

un ki jaanib se koi aisa ishaara na hua

Dar se tauhin-e-mohabbat ke main KHamosh raha

nam phir le ke pukarun ye gawara na hua

dard-o-gham jaur-o-sitam aah-o-fughan ranj-o-malal

ye to sab mil gae 'nazi' wo hamara na hua