aab-e-rawan hun rasta kyun na DhunDh lun

āb-e-ravāñ huuñ rāsta kyuuñ na DhūñDh luuñ

maiñ tere intizār meñ kab tak rukā rahūñ

tārīkiyāñ muhīt haiñ har anjuman pe aaj

lāzim nahīñ ki maiñ tirī mahfil meñ hī jalūñ

ghabrā rahā hai jī mirā tan ke makān meñ

majbūriyoñ ke saa.e meñ kab tak paḌā rahūñ

niklā huuñ terī bazm se mānind-e-dūd-e-sham.a

chāhūñ bhī ab kabhī to maiñ vāpas na aa sukūñ

milnā tirā to ḳhair baḌī baat hai magar

itnā bhī kam nahīñ hai ki maiñ ḳhud ko DhūñDh luuñ

ḳhud se bhī koī rabt nahīñ merā in dinoñ

tujh se ta.alluqāt kī tajrīd kyā karūñ

āñkheñ bujhī bujhī haiñ to manzar miTe miTe

ai zindagī kahāñ se tujhe āb-o-rañg duuñ

'rūhī' ye daur-e-zīst musalsal azaab hai

khul kar na hañs sakūñ na kabhī khul ke ro sakūñ

aab-e-rawan hun rasta kyun na DhunDh lun

main tere intizar mein kab tak ruka rahun

tarikiyan muhit hain har anjuman pe aaj

lazim nahin ki main teri mahfil mein hi jalun

ghabra raha hai ji mera tan ke makan mein

majburiyon ke sae mein kab tak paDa rahun

nikla hun teri bazm se manind-e-dud-e-shama

chahun bhi ab kabhi to main wapas na aa sukun

milna tera to KHair baDi baat hai magar

itna bhi kam nahin hai ki main KHud ko DhunDh lun

KHud se bhi koi rabt nahin mera in dinon

tujh se talluqat ki tajrid kya karun

aankhen bujhi bujhi hain to manzar miTe miTe

ai zindagi kahan se tujhe aab-o-rang dun

'ruhi' ye daur-e-zist musalsal azab hai

khul kar na hans sakun na kabhi khul ke ro sakun