aabaad hai andeshon se dil kya kiya jae

ābād hai andeshoñ se dil kyā kiyā jaa.e

kyā fikr ko āmāda-e-saharā kiyā jaa.e

ab lutf mujhe dene lage paañv ke chhāle

dushvār mirā aur bhī rasta kiyā jaa.e

idrāk-e-tahayyur ke khulīñ mujh pe bhī raste

maiñ apnī ḳhabar luuñ mujhe tanhā kiyā jaa.e

ā.īne ke chehre se haTe gard kisī taur

ab sāmne mere mirā chehra kiyā jaa.e

hisse meñ mire aa to ga.ī dard kī sauġhāt

ab chal ke zarā shukr kā sajda kiyā jaa.e

kyā itnā baḌā jurm thā dil us se lagānā

kyā thā ye munāsib mujhe rusvā kiyā jaa.e

itnī bhī nigāhoñ pe na ho jalvoñ kī bandish

itnā bhī na in āñkhoñ se pardā kiyā jaa.e

kyā arz-e-talab ke liye muñh kholnā yāvar

bas ḳhatm ḳhamoshī pe ye qissa kiyā jaa.e

aabaad hai andeshon se dil kya kiya jae

kya fikr ko aamada-e-sahara kiya jae

ab lutf mujhe dene lage panw ke chhaale

dushwar mera aur bhi rasta kiya jae

idrak-e-tahayyur ke khulin mujh pe bhi raste

main apni KHabar lun mujhe tanha kiya jae

aaine ke chehre se haTe gard kisi taur

ab samne mere mera chehra kiya jae

hisse mein mere aa to gai dard ki saughat

ab chal ke zara shukr ka sajda kiya jae

kya itna baDa jurm tha dil us se lagana

kya tha ye munasib mujhe ruswa kiya jae

itni bhi nigahon pe na ho jalwon ki bandish

itna bhi na in aankhon se parda kiya jae

kya arz-e-talab ke liye munh kholna yawar

bas KHatm KHamoshi pe ye qissa kiya jae