aadab-e-zabt-e-ishq na ruswa kare koi

ādāb-e-zabt-e-ishq na rusvā kare koī

apnī bisāt dekh ke saudā kare koī

kyā taur har farāz se uTThe ġhubār-e-shauq

vo soz-e-ishtiyāq to paidā kare koī

karte haiñ ġham se māñjh ke fitrat ko āb-dār

kār-e-junūñ meñ ham se ifāda kare koī

uTThe dahan-darīda sabhī da.avedār-e-ishq

ab kyā kisī ke 'ishq kā dā'vā kare koī

guzrī hai bār-bār sabā ik maqām se

shāyad kabhī idhar kā irāda kare koī

aisā na ho ki zabt ke ādāb se bhī jaa.eñ

is darja iltifāt na bartā kare koī

aadab-e-zabt-e-ishq na ruswa kare koi

apni bisat dekh ke sauda kare koi

kya taur har faraaz se uTThe ghubar-e-shauq

wo soz-e-ishtiyaq to paida kare koi

karte hain gham se manjh ke fitrat ko aab-dar

kar-e-junun mein hum se ifada kare koi

uTThe dahan-darida sabhi dawedar-e-ishq

ab kya kisi ke 'ishq ka da'wa kare koi

guzri hai bar-bar saba ek maqam se

shayad kabhi idhar ka irada kare koi

aisa na ho ki zabt ke aadab se bhi jaen

is darja iltifat na barta kare koi