aadatan mayus ab to sham hai

ādatan māyūs ab to shaam hai

hijr to bas muft hī badnām hai

aaj phir dhuñdlā gayā merā ḳhayāl

aaj phir alfāz meñ kohrām hai

alganī par Taañg kar din kā libās

raat ko ab chain hai ārām hai

naqs ta.abīroñ meñ kyuuñ karnā rahe

ḳhvāb hī jab ke hamārā ḳhaam hai

muḳhtalif shakleñ banānā vaqt kā

bas yahī to gardish-e-ayyām hai

is firāq-e-nā-tavāñ meñ aaj phir

ye ġhazal bhī lo tumhāre naam hai

barf ke dariyā kināre āftāb

yā vahāñ ma.ashūq lāla-fām hai

falsafa koī zarūrī to nahīñ

masḳharī bhī shā.irī meñ aam hai

yaar batlā do mujhe us kā pata

mujh ko 'ulfat' se zarā sā kaam hai

aadatan mayus ab to sham hai

hijr to bas muft hi badnam hai

aaj phir dhundla gaya mera KHayal

aaj phir alfaz mein kohram hai

algani par Tang kar din ka libas

raat ko ab chain hai aaram hai

naqs tabiron mein kyun karna rahe

KHwab hi jab ke hamara KHam hai

muKHtalif shaklen banana waqt ka

bas yahi to gardish-e-ayyam hai

is firaq-e-na-tawan mein aaj phir

ye ghazal bhi lo tumhaare nam hai

barf ke dariya kinare aaftab

ya wahan mashuq lala-fam hai

falsafa koi zaruri to nahin

masKHari bhi shairi mein aam hai

yar batla do mujhe us ka pata

mujh ko 'ulfat' se zara sa kaam hai