aadmi KHud ko ajab rang mein Duba dekhe

aadmī ḳhud ko ajab rañg meñ Duubā dekhe

hoñT tishna hoñ magar aañkh meñ dariyā dekhe

ziist karne ke liye umr bahut thoḌī hai

apnī duniyā se alag kyā koī duniyā dekhe

dasht-e-tanhā.ī meñ ab lams-e-judā.ī bhī nahīñ

ā.ina-gar se kaho apnā tamāshā dekhe

shahr-āshob meñ mahtāb-sifat koī to ho

zindagī biit rahī hai koī chehra dekhe

āḳhirī ma.arka-e-shab meñ jo bach jaa.e use

ye zarūrī to nahīñ sub.h kā taarā dekhe

mustaqil hijr ne āñkhoñ kā hunar chhīn liyā

kaun ab taaq meñ ḳhurshed ko jaltā dekhe

aisā mumkin to nahīñ phir bhī ye jī chāhtā hai

maiñ na ghar lauTūñ to shab bhar koī rasta dekhe

aadmi KHud ko ajab rang mein Duba dekhe

honT tishna hon magar aankh mein dariya dekhe

zist karne ke liye umr bahut thoDi hai

apni duniya se alag kya koi duniya dekhe

dasht-e-tanhai mein ab lams-e-judai bhi nahin

aaina-gar se kaho apna tamasha dekhe

shahr-ashob mein mahtab-sifat koi to ho

zindagi bit rahi hai koi chehra dekhe

aaKHiri marka-e-shab mein jo bach jae use

ye zaruri to nahin subh ka tara dekhe

mustaqil hijr ne aankhon ka hunar chhin liya

kaun ab taq mein KHurshed ko jalta dekhe

aisa mumkin to nahin phir bhi ye ji chahta hai

main na ghar lauTun to shab bhar koi rasta dekhe