aae hain baada-nosh baDi aan-ban par

aa.e haiñ bāda-nosh baḌī ān-bān par

mela lagā hai pīr-e-muġhāñ kī dukān par

saaqī 'atā ho ab mujhe sāġhar sharāb kā

chhā.ī huī hai kaisī ghaTā āsmān par

rote haiñ tere ishq meñ ai rashk-e-māh jab

karte haiñ log ḳhanda hamārī fuġhān par

paidā huā asar na kabhī merī aah meñ

khāyā na us ne rahm kabhī be-zabān par

ai kaash ye nasīb kareñ itnī yāvarī

pahuñchūñ kabhī maiñ shab ko tumhāre makān par

kis shaan se vo aaj ga.e haiñ 'adū ke ghar

mujh se bigaḌ ke pahuñche haiñ vo āsmān par

allāh shab-e-firāq meñ vo āh-o-zāriyāñ

har vaqt sadme kaise haiñ mujh nīm-jān par

likkhā jo ḳhatt-e-shauq unheñ maiñ ne hijr meñ

rone lage raqīb bhī mere bayān par

yārab tire hī fazl kā ummīd-vār huuñ

khātā nahīñ hai rahm koī nā-tavān par

har-dam tire firāq meñ phirtā huuñ sū-ba-sū

lākhoñ balā.eñ aatī haiñ 'ājiz' kī jaan par

aae hain baada-nosh baDi aan-ban par

mela laga hai pir-e-mughan ki dukan par

saqi 'ata ho ab mujhe saghar sharab ka

chhai hui hai kaisi ghaTa aasman par

rote hain tere ishq mein ai rashk-e-mah jab

karte hain log KHanda hamari fughan par

paida hua asar na kabhi meri aah mein

khaya na us ne rahm kabhi be-zaban par

ai kash ye nasib karen itni yawari

pahunchun kabhi main shab ko tumhaare makan par

kis shan se wo aaj gae hain 'adu ke ghar

mujh se bigaD ke pahunche hain wo aasman par

allah shab-e-firaq mein wo aah-o-zariyan

har waqt sadme kaise hain mujh nim-jaan par

likkha jo KHatt-e-shauq unhen main ne hijr mein

rone lage raqib bhi mere bayan par

yarab tere hi fazl ka ummid-war hun

khata nahin hai rahm koi na-tawan par

har-dam tere firaq mein phirta hun su-ba-su

lakhon balaen aati hain 'ajiz' ki jaan par