aae the ghar mein aag lagane sharir log

aa.e the ghar meñ aag lagāne sharīr log

aur hañs rahe the duur khaḌe be-zamīr log

himmat kahāñ hai mujh meñ ki sach bol kar dikhā.ūñ

baiThe hue haiñ joḌe kamānoñ meñ tiir log

har aadmī ke lab pe hai ik dil-shikan savāl

āḳhir kahāñ chale ga.e vo dil-pazīr log

ik roz kah diyā thā haqīr inkisār meñ

ye baat sach samajh ga.e saare haqīr log

dast-e-talab darāz kareñ bhī to kyā kareñ

dekhe ga.e haiñ dast-nigar dast-gīr log

jo pūchhnā hai pūchh le aur chhoḌ rāsta

Tikte nahīñ kisī bhī jagah ham faqīr log

barpā kiyā gayā thā ġharībī miTāo jashn

shāmil the is meñ shahr ke saare amiir log

aae the ghar mein aag lagane sharir log

aur hans rahe the dur khaDe be-zamir log

himmat kahan hai mujh mein ki sach bol kar dikhaun

baiThe hue hain joDe kamanon mein tir log

har aadmi ke lab pe hai ek dil-shikan sawal

aaKHir kahan chale gae wo dil-pazir log

ek roz kah diya tha haqir inkisar mein

ye baat sach samajh gae sare haqir log

dast-e-talab daraaz karen bhi to kya karen

dekhe gae hain dast-nigar dast-gir log

jo puchhna hai puchh le aur chhoD rasta

Tikte nahin kisi bhi jagah hum faqir log

barpa kiya gaya tha gharibi miTao jashn

shamil the is mein shahr ke sare amir log