aaenge gar unhen ghairat hogi

ā.eñge gar unheñ ġhairat hogī

vo na aa.e to qayāmat hogī

hashr meñ kaun sunegā fariyād

sadd-e-rah hadd-e-samā.at hogī

nañg-e-nazzāra hai ham chashma-e-ām

ham na dekheñge jo rūyat hogī

yak taraf ho ke raheñge yak-rañg

ham ko a.arāf se nafrat hogī

shikva hai dīn-e-vafā meñ ehdās

mujh se kaahe ko ye bid.at hogī

haiñ qayāmat meñ tāmmul kyā kyā

vasl kī kaun sī saa.at hogī

reg huuñ chāhiye dariyā-e-sharāb

mai-kade par na qanā.at hogī

hai shab-e-vasl-e-do-ālam gesū

vo jabīñ sub.h-e-shahādat hogī

bahr-e-rahmat hai do-ālam ko muhīt

mere mashrab kī sī vus.at hogī

mai se ālūda huā dāman-e-husn

muttahim ḳhuun kī tohmat hogī

khīñchtā thā koī un kā dāman

ḳhaak meñ vasl kī hasrat hogī

raas hai chāra-e-bil-misl mujhe

qaid se aur bhī vahshat hogī

sho.ala-rū paḌhte haiñ kalima terā

sham.a añgusht-e-shahādat hogī

ġhair kī aag meñ jalne na diyā

husn kī sī kise ġhairat hogī

vāshuda ġhuncha-e-ḳhātir mat maañg

muntashir bū-e-mohabbat hogī

zahr lagtī hai unheñ merī hayāt

kyuuñ ki manzūr-e-shahādat hogī

khā ga.e nargis-e-shahlā kā fareb

ki un āñkhoñ meñ muravvat hogī

terī zulfoñ ne chaḌhā.e chille

dil kī is kūche meñ turbat hogī

ban ga.e saat jahannum tah-e-ḳhāk

kis ke pahlū meñ ye hiddat hogī

kahīñ sar phoḌ ke mar rahiye 'bayāñ'

ik jahāñ se to farāġhat hogī

aaenge gar unhen ghairat hogi

wo na aae to qayamat hogi

hashr mein kaun sunega fariyaad

sadd-e-rah hadd-e-samaat hogi

nang-e-nazzara hai hum chashma-e-am

hum na dekhenge jo ruyat hogi

yak taraf ho ke rahenge yak-rang

hum ko aaraf se nafrat hogi

shikwa hai din-e-wafa mein ehdas

mujh se kahe ko ye bidat hogi

hain qayamat mein tammul kya kya

wasl ki kaun si saat hogi

reg hun chahiye dariya-e-sharab

mai-kade par na qanaat hogi

hai shab-e-wasl-e-do-alam gesu

wo jabin subh-e-shahadat hogi

bahr-e-rahmat hai do-alam ko muhit

mere mashrab ki si wusat hogi

mai se aaluda hua daman-e-husn

muttahim KHun ki tohmat hogi

khinchta tha koi un ka daman

KHak mein wasl ki hasrat hogi

ras hai chaara-e-bil-misl mujhe

qaid se aur bhi wahshat hogi

shoala-ru paDhte hain kalima tera

shama angusht-e-shahadat hogi

ghair ki aag mein jalne na diya

husn ki si kise ghairat hogi

washuda ghuncha-e-KHatir mat mang

muntashir bu-e-mohabbat hogi

zahr lagti hai unhen meri hayat

kyun ki manzur-e-shahadat hogi

kha gae nargis-e-shahla ka fareb

ki un aankhon mein murawwat hogi

teri zulfon ne chaDhae chille

dil ki is kuche mein turbat hogi

ban gae sat jahannum tah-e-KHak

kis ke pahlu mein ye hiddat hogi

kahin sar phoD ke mar rahiye 'bayan'

ek jahan se to faraghat hogi