aaftab-o-mah-o-anjum kahkashan hone lage

āftāb-o-māh-o-anjum kahkashāñ hone lage

ḳhaak ke zarre harīf-e-āsmāñ hone lage

jaag uThThā hai diloñ meñ jab se ehsās-e-anā

fāsle un ke hamāre darmiyāñ hone lage

ab kisī nā-ahl kī taqlīd ke qaa.il nahīñ

ahl-e-gulshan vāqif-e-sūd-o-ziyāñ hone lage

ai mire mā'būd koī rāsta tū hī dikhā

kal ke rahzan aaj mīr-e-kārvāñ hone lage

vahm hotā hai kahīñ ye bhī koī sāzish na ho

'saif' jo nā-mehrbāñ the mehrbāñ hone lage

aaftab-o-mah-o-anjum kahkashan hone lage

KHak ke zarre harif-e-asman hone lage

jag uThTha hai dilon mein jab se ehsas-e-ana

fasle un ke hamare darmiyan hone lage

ab kisi na-ahl ki taqlid ke qail nahin

ahl-e-gulshan waqif-e-sud-o-ziyan hone lage

ai mere ma'bud koi rasta tu hi dikha

kal ke rahzan aaj mir-e-karwan hone lage

wahm hota hai kahin ye bhi koi sazish na ho

'saif' jo na-mehrban the mehrban hone lage