aag aangan mein KHud laga di hai

aag āñgan meñ ḳhud lagā dī hai

jis ne insāf kī nidā dī hai

bhaa.ī do baT ga.e zamīnoñ meñ

ghar meñ dīvār ik banā dī hai

tum hī iblīs ke sipāhī ho

tum ne taqsīm ko havā dī hai

ik sadā us ne an-sunī kar dī

bārhā ham ne kab sadā dī hai

raushnī hijr meñ aziyyat thī

jab bhī sham.a jalī bujhā dī hai

jhuuT kī ār-pār lazzat ne

sach kī tāsīr hī bhulā dī hai

dosto kashtiyāñ jalānī thiiñ

tum ne tārīḳh hī jalā dī hai

log sab muntashir na ho jaa.eñ

aaj phir ishq ne sadā dī hai

hārtā kyoñ 'ḳhalīl' maañ ne jab

chuum kar kal jabīñ duā dī hai

aag aangan mein KHud laga di hai

jis ne insaf ki nida di hai

bhai do baT gae zaminon mein

ghar mein diwar ek bana di hai

tum hi iblis ke sipahi ho

tum ne taqsim ko hawa di hai

ek sada us ne an-suni kar di

barha hum ne kab sada di hai

raushni hijr mein aziyyat thi

jab bhi shama jali bujha di hai

jhuT ki aar-par lazzat ne

sach ki tasir hi bhula di hai

dosto kashtiyan jalani thin

tum ne tariKH hi jala di hai

log sab muntashir na ho jaen

aaj phir ishq ne sada di hai

haarta kyon 'KHalil' man ne jab

chum kar kal jabin dua di hai