aag thi aisi ki arman jal gae

aag thī aisī ki armāñ jal ga.e

dil ke kāġhaz āñsuoñ meñ gal ga.e

rañg hai ḳhushbū bhī hai saaya bhī hai

kis nagar ''ai peḌ tere phal ga.e

khet kī miTTī ko vīrāñ dekh kar

gaañv vaale DhūñDne bādal ga.e

sah chukī sab dhuup paanī ke azaab

zindagī āḳhir tire kas-bal ga.e

jāgtī āñkheñ thiiñ apnī aur ham

ḳhvāb ke āñgan meñ pal do pal ga.e

jehl kā saaya qad-āvar jab huā

khoTe sikke har taraf phir chal ga.e

shahr ke sapne sajāne ai 'sadaf'

be-tahāshā dauḌte jañgal ga.e

aag thi aisi ki arman jal gae

dil ke kaghaz aansuon mein gal gae

rang hai KHushbu bhi hai saya bhi hai

kis nagar ai peD tere phal gae

khet ki miTTi ko viran dekh kar

ganw wale DhunDne baadal gae

sah chuki sab dhup pani ke azab

zindagi aaKHir tere kas-bal gae

jagti aankhen thin apni aur hum

KHwab ke aangan mein pal do pal gae

jehl ka saya qad-awar jab hua

khoTe sikke har taraf phir chal gae

shahr ke sapne sajaane ai 'sadaf'

be-tahasha dauDte jangal gae