aage kuchh uske zikr-e-dil-e-zar mat karo

aage kuchh us ke zikr-e-dil-e-zār mat karo

sab ḳhairiyat hai us se kuchh iz.hār mat karo

jaane do jo nasīb meñ honā thā so huā

yaaro ḳhudā ke vāste takrār mat karo

ā.īna le ke pahle tanik saj to dekh lo

milne kā ġhair ke abhī inkār mat karo

sar chaḌh rahā hai kaal yūñhī āshiqoñ ke yaañ

paTTī se tum ye baal numūdār mat karo

ai āh-o-nāla chhup ke maiñ aayā huuñ is jagah

aalam ko shor kar ke ḳhabar-dār mat karo

apnī bisāt meñ to yahī jins-e-dil hai yaañ

go ab pasand is ko ḳharīdār mat karo

pyāre kamar kahāñ hai tumhāre yūñhī ba-zan

sun kar kisī se jhuuT par isrār mat karo

'qā.em' vo tab kahe thā shab ahvāl-e-ḳhalq dekh

mujh sā to haq kisī ko trahdār mat karo

aage kuchh us ke zikr-e-dil-e-zar mat karo

sab KHairiyat hai us se kuchh izhaar mat karo

jaane do jo nasib mein hona tha so hua

yaro KHuda ke waste takrar mat karo

aaina le ke pahle tanik saj to dekh lo

milne ka ghair ke abhi inkar mat karo

sar chaDh raha hai kal yunhi aashiqon ke yan

paTTi se tum ye baal numudar mat karo

ai aah-o-nala chhup ke main aaya hun is jagah

aalam ko shor kar ke KHabar-dar mat karo

apni bisat mein to yahi jins-e-dil hai yan

go ab pasand is ko KHaridar mat karo

pyare kamar kahan hai tumhaare yunhi ba-zan

sun kar kisi se jhuT par israr mat karo

'qaem' wo tab kahe tha shab ahwal-e-KHalq dekh

mujh sa to haq kisi ko trahdar mat karo