aah nikle na ab sada nikle

aah nikle na ab sadā nikle

haath uTThe to bas duā nikle

ashk āñkhoñ kī hai vafādārī

jo na chhalke to bevafā nikle

tum na majnūñ ho na koī lailā

ishq-e-umr-e-darāz kyā nikle

aañkh Dartī hai ab ḳhayāloñ se

ḳhvāb koī na phir burā nikle

roz patthar tarāshtā hī rahā

shāyad un meñ kabhī sadā nikle

is liye chup huuñ ḳhāksārī meñ

kyā pata ghar kā hī diyā nikle

ḳhaak jab bhī uḌe galī meñ tire

maiñ jalūñ aur bas dhuāñ nikle

Dūbne ko safīna hai merā

kaash koī to ab duā nikle

yā ḳhudā tañg aa gayā huuñ maiñ

dard nikle na kuchh davā nikle

'pyāsā' nā-vāqifoñ kī bastī meñ

DhūñDhtā huuñ koī sagā nikle

aah nikle na ab sada nikle

hath uTThe to bas dua nikle

ashk aankhon ki hai wafadari

jo na chhalke to bewafa nikle

tum na majnun ho na koi laila

ishq-e-umr-e-daraaz kya nikle

aankh Darti hai ab KHayalon se

KHwab koi na phir bura nikle

roz patthar tarashta hi raha

shayad un mein kabhi sada nikle

is liye chup hun KHaksari mein

kya pata ghar ka hi diya nikle

KHak jab bhi uDe gali mein tere

main jalun aur bas dhuan nikle

Dubne ko safina hai mera

kash koi to ab dua nikle

ya KHuda tang aa gaya hun main

dard nikle na kuchh dawa nikle

'pyasa' na-waqifon ki basti mein

DhunDhta hun koi saga nikle