aah ye daur ki jis mein lab-o-ruKHsar bike

aah ye daur ki jis meñ lab-o-ruḳhsār bike

dast-e-fitrat ke banā.e hue shahkār bike

dil ke jazbāt bike zehn ke afkār bike

sach to ye hai ki har ik ahd meñ fankār bike

asr-e-hāzir meñ koī chiiz bhī anmol nahīñ

ishq kī aan bike husn kā pindār bike

ik dahaktī huī dozaḳh ko bujhāne ke liye

kitne hī phuul se paikar sar-e-bāzār bike

nafs kī devī kā pur-kaif ishārā pā kar

sāhib-e-hosh bike sāhab-e-kirdār bike

ḳhud-ġharaz chand nigahbānoñ ke hāthoñ aksar

phuul to phuul haiñ gulzār ke gulzār bike

bazm-e-sāqī bhī vo bāzār-e-tarab hai 'vāhid'

ek sāġhar pe jahāñ fitrat-e-ḳhuddār bike

aah ye daur ki jis mein lab-o-ruKHsar bike

dast-e-fitrat ke banae hue shahkar bike

dil ke jazbaat bike zehn ke afkar bike

sach to ye hai ki har ek ahd mein fankar bike

asr-e-hazir mein koi chiz bhi anmol nahin

ishq ki aan bike husn ka pindar bike

ek dahakti hui dozaKH ko bujhane ke liye

kitne hi phul se paikar sar-e-bazar bike

nafs ki dewi ka pur-kaif ishaara pa kar

sahib-e-hosh bike sahab-e-kirdar bike

KHud-gharaz chand nigahbanon ke hathon aksar

phul to phul hain gulzar ke gulzar bike

bazm-e-saqi bhi wo bazar-e-tarab hai 'wahid'

ek saghar pe jahan fitrat-e-KHuddar bike