aahen bhi mari jati hain aur past hain nale

aa.heñ bhī marī jaatī haiñ aur past haiñ naale

kyā mar hī ga.e mujh ko mire DhūñDne vaale

saayā koī kahtā hai akelā mujhe pā kar

jiine kī tamannā hī tujhe maar na Daale

hairān tujhe kartī haiñ do chaar musībat

kitnoñ ko yahāñ jaan ke paḌ jaate haiñ laale

maiñ jhuuT ke saa.e meñ khaḌā huuñ to nahīñ Dar

be-maut mareñge ye tire bheje jiyāle

kitnoñ ko mayassar vo mire baa'd rahā par

maiñ kar na sakā ḳhud ko kisī ke bhī havāle

āsān mohabbat kā safar jaan na pyāre

pairoñ meñ nahīñ 'aql meñ paḌ jaate haiñ chhāle

fāqoñ pe guzar kartā rahā jin ke liye tū

chhīneñge tire muñh se tire haq ke nivāle

achchhā na sahī kuchh to burā kar ke rahūñgā

ik din to mire naam se nikleñge risāle

ik aise masīhā kī zarūrat hai 'jalāl' ab

jo ruuh mirī jism ke malbe se nikāle

aahen bhi mari jati hain aur past hain nale

kya mar hi gae mujh ko mere DhunDne wale

saya koi kahta hai akela mujhe pa kar

jine ki tamanna hi tujhe mar na Dale

hairan tujhe karti hain do chaar musibat

kitnon ko yahan jaan ke paD jate hain lale

main jhuT ke sae mein khaDa hun to nahin Dar

be-maut marenge ye tere bheje jiyale

kitnon ko mayassar wo mere ba'd raha par

main kar na saka KHud ko kisi ke bhi hawale

aasan mohabbat ka safar jaan na pyare

pairon mein nahin 'aql mein paD jate hain chhaale

faqon pe guzar karta raha jin ke liye tu

chhinenge tere munh se tere haq ke niwale

achchha na sahi kuchh to bura kar ke rahunga

ek din to mere nam se niklenge risale

ek aise masiha ki zarurat hai 'jalal' ab

jo ruh meri jism ke malbe se nikale