aahon mein sharar le kar jaun to kahan jaun

aahoñ meñ sharar le kar jā.ūñ to kahāñ jā.ūñ

jazboñ kā bhañvar le kar jā.ūñ to kahāñ jā.ūñ

har samt ḳhudāoñ ke ā.īne haiñ istāda

gustāḳh-nazar le kar jā.ūñ to kahāñ jā.ūñ

maiñ zahr-e-halāhal kā qaa.il to nahīñ lekin

nāsūr-e-jigar le kar jā.ūñ to kahāñ jā.ūñ

dushman hai huā jaanī bārish bhī hai tezābī

jaltā huā ghar le kar jā.ūñ to kahāñ jā.ūñ

suntā huuñ ki sajde meñ hai qurb-e-ḳhudāvandī

fir.aun kā sar le kar jā.ūñ to kahāñ jā.ūñ

sayyād ke kūche se har raah guzartī hai

ab izn-e-safar le kar jā.ūñ to kahāñ jā.ūñ

hassās zamāne meñ a.amāl kī vaq.at hai

lafzoñ kā hunar le kar jā.ūñ to kahāñ jā.ūñ

aahon mein sharar le kar jaun to kahan jaun

jazbon ka bhanwar le kar jaun to kahan jaun

har samt KHudaon ke aaine hain istada

gustaKH-nazar le kar jaun to kahan jaun

main zahr-e-halahal ka qail to nahin lekin

nasur-e-jigar le kar jaun to kahan jaun

dushman hai hua jaani barish bhi hai tezabi

jalta hua ghar le kar jaun to kahan jaun

sunta hun ki sajde mein hai qurb-e-KHudawandi

firaun ka sar le kar jaun to kahan jaun

sayyaad ke kuche se har rah guzarti hai

ab izn-e-safar le kar jaun to kahan jaun

hassas zamane mein aamal ki waqat hai

lafzon ka hunar le kar jaun to kahan jaun