aahon se honge gumbad-e-haft-asman KHarab

aahoñ se hoñge gumbad-e-haft-āsmāñ ḳharāb

kis kis makān ko na karegā dhuāñ ḳharāb

mar kar bhī apne saath raheñ harzā-gardiyāñ

hai musht-e-ḳhāk sūrat-e-reg-e-ravāñ ḳharāb

qāmat vo hai ki jis se qayāmat hai āshkār

naqsha vo hai ki jis se hai naqsh-e-jahāñ ḳharāb

tāb-o-tavāñ ko jism meñ yuuñ DhūñDhtī hai ruuh

jaise ġhubār-e-rāh pas-e-kārvāñ ḳharāb

nā-sāz ho mizāj to bātoñ meñ kyā mazā

bīmār kī tarah hai zabān o dahāñ ḳharāb

zevar zavāl-e-husn meñ pahnā to kyā bahār

patte sunahre sūrat-e-barg-e-ḳhizāñ ḳharāb

qitmīr se karūñgā sag-e-yār kā gilā

marqad ke ġhaar meñ jo huiiñ haDDiyāñ ḳharāb

ai 'bahr' tujh ko DhūñD phire shash-jihat meñ ham

terā patā kahīñ bhī hai o ḳhānumāñ-ḳharāb

aahon se honge gumbad-e-haft-asman KHarab

kis kis makan ko na karega dhuan KHarab

mar kar bhi apne sath rahen harza-gardiyan

hai musht-e-KHak surat-e-reg-e-rawan KHarab

qamat wo hai ki jis se qayamat hai aashkar

naqsha wo hai ki jis se hai naqsh-e-jahan KHarab

tab-o-tawan ko jism mein yun DhunDhti hai ruh

jaise ghubar-e-rah pas-e-karwan KHarab

na-saz ho mizaj to baaton mein kya maza

bimar ki tarah hai zaban o dahan KHarab

zewar zawal-e-husn mein pahna to kya bahaar

patte sunahre surat-e-barg-e-KHizan KHarab

qitmir se karunga sag-e-yar ka gila

marqad ke ghaar mein jo huin haDDiyan KHarab

ai 'bahr' tujh ko DhunD phire shash-jihat mein hum

tera pata kahin bhi hai o KHanuman-KHarab