aai nahin kya qaid hai gulshan mein saba bhi

aa.ī nahīñ kyā qaid hai gulshan meñ sabā bhī

aane lagī zanjīr kī kānoñ meñ sadā bhī

pā jā.egā dil us meñ bhī taḳhsīs ke pahlū

ma.alūm ye hotā to na karte vo jafā bhī

DhūñDā kiye har gaam pe hāthoñ kā sahārā

bhūle se kabhī bahr-e-duā haath uThā bhī

shāne pe bikhere hue nikhrī huī zulfeñ

barsī bhī to ghanghor ajab hai ye ghaTā bhī

bhāyā hai jo mukhḌe ko chhupāne kā tarīqa

dekho kabhī āñkhoñ ko charāne kī adā bhī

jaise ho kañval aab meñ pākīza tabī.at

rahte hue duniyā meñ haiñ duniyā se judā bhī

har aan jafā jaan ke karte ho sitam hai

har saañs ye kahtī hai ki ho jān-e-vafā bhī

āñkheñ ye batātī haiñ ki dil aur kahīñ hai

kahnā thā mujhe tum se abhī is ke sivā bhī

mumkin hai gire koī himāla se to uTh jaa.e

'hāmid' kabhī uTThā hai nigāhoñ se girā bhī

aai nahin kya qaid hai gulshan mein saba bhi

aane lagi zanjir ki kanon mein sada bhi

pa jaega dil us mein bhi taKHsis ke pahlu

malum ye hota to na karte wo jafa bhi

DhunDa kiye har gam pe hathon ka sahaara

bhule se kabhi bahr-e-dua hath uTha bhi

shane pe bikhere hue nikhri hui zulfen

barsi bhi to ghanghor ajab hai ye ghaTa bhi

bhaya hai jo mukhDe ko chhupane ka tariqa

dekho kabhi aankhon ko charane ki ada bhi

jaise ho kanwal aab mein pakiza tabiat

rahte hue duniya mein hain duniya se juda bhi

har aan jafa jaan ke karte ho sitam hai

har sans ye kahti hai ki ho jaan-e-wafa bhi

aankhen ye batati hain ki dil aur kahin hai

kahna tha mujhe tum se abhi is ke siwa bhi

mumkin hai gire koi himala se to uTh jae

'hamid' kabhi uTTha hai nigahon se gira bhi