aaina ru-ba-ru hai shikasta khaDa hun main

ā.īna rū-ba-rū hai shikasta khaḌā huuñ maiñ

duniyā samajh rahī hai ki sab se baḌā huuñ maiñ

sadiyoñ se ik nigāh ko āñkheñ taras ga.iiñ

dil ko bichhā.e raah meñ kab se khaḌā huuñ maiñ

lafzoñ ke her-pher se ma.anī badal gayā

mafhūm-e-zindagī pe abhī tak aḌā huuñ maiñ

kuchh apnā ġham samāj kā ġham dostoñ kā ġham

ġham-hā-e-be-shumār meñ tanhā khaḌā huuñ maiñ

har shaḳhs aa.ine se yahī pūchhtā rahā

is shahr-e-be-libās meñ kab se paḌā huuñ maiñ

'nashtar' udaas raat kī mahrūmiyoñ se pūchh

kyoñ subh-e-dil-navāz ke pīchhe paḌā huuñ maiñ

aaina ru-ba-ru hai shikasta khaDa hun main

duniya samajh rahi hai ki sab se baDa hun main

sadiyon se ek nigah ko aankhen taras gain

dil ko bichhae rah mein kab se khaDa hun main

lafzon ke her-pher se mani badal gaya

mafhum-e-zindagi pe abhi tak aDa hun main

kuchh apna gham samaj ka gham doston ka gham

gham-ha-e-be-shumar mein tanha khaDa hun main

har shaKHs aaine se yahi puchhta raha

is shahr-e-be-libas mein kab se paDa hun main

'nashtar' udas raat ki mahrumiyon se puchh

kyon subh-e-dil-nawaz ke pichhe paDa hun main