aaina dekha to surat apni pahchani gai

aa.ina dekhā to sūrat apnī pahchānī ga.ī

bhuul hī baiThe the ḳhud ko umr arzānī ga.ī

jānte haiñ is talātum-ḳhez dariyā kī adā

ik hamārā naam sun kar mauj-e-sailānī ga.ī

ik charāġh-e-dil bachā thā aur sannāTe kī shab

zau-fishāñ tāroñ kī maddham ḳhvāb-afshānī ga.ī

kaun hai jo jī sakegā mo.ajizoñ se sānehe

us nigāh-e-shauq kī ham par mehrbānī ga.ī

aaj shāyad Duub kar us ne kiyā hai ham ko yaad

is havā-e-sard kī rañgīn nādānī ga.ī

kis qadar tanhā hai dil is ajnabī sī raah par

bāġhbāñ kī jo navāzish thī nigahbānī ga.ī

ab mujhe is dil ke luTne kā nahīñ koī malāl

vaa.e shauq-e-dil salāmat ho pashemānī ga.ī

jāniye kyā kyā dukhoñ ne gher kar rusvā kiyā

chashm-e-tar meñ Dūbte tāroñ kī hairānī ga.ī

aaina dekha to surat apni pahchani gai

bhul hi baiThe the KHud ko umr arzani gai

jaante hain is talatum-KHez dariya ki ada

ek hamara nam sun kar mauj-e-sailani gai

ek charagh-e-dil bacha tha aur sannaTe ki shab

zau-fishan taron ki maddham KHwab-afshani gai

kaun hai jo ji sakega moajizon se sanehe

us nigah-e-shauq ki hum par mehrbani gai

aaj shayad Dub kar us ne kiya hai hum ko yaad

is hawa-e-sard ki rangin nadani gai

kis qadar tanha hai dil is ajnabi si rah par

baghban ki jo nawazish thi nigahbani gai

ab mujhe is dil ke luTne ka nahin koi malal

wae shauq-e-dil salamat ho pashemani gai

jaaniye kya kya dukhon ne gher kar ruswa kiya

chashm-e-tar mein Dubte taron ki hairani gai