aaina-KHana bhi andoh-e-tamanna nikla

ā.ina-ḳhāna bhī andoh-e-tamannā niklā

ġhaur se dekhā to apnā hī tamāshā niklā

zindagī mahfil-e-shab kī thī pas-andāz-e-sharāb

piine baiThe to bas ik ghūñT zarā sā niklā

phir chalā mausam-e-vahshat meñ sar-e-maqtal-e-ishq

qur.a-e-fāl mire naam dobāra niklā

dād-e-shā.istagī-e-ġham kī tavaqqo be-sūd

dil bhī kam-baḳht taraf-dār usī kā niklā

hai ajab tarz kā rahrav dil-e-shorīda-qadam

jab bhī niklā safar-e-ishq pe tanhā niklā

vo raqīboñ kā pata pūchhne aa.e mire ghar

koī to un se mulāqāt kā rasta niklā

dar-ba-dar ḳhvār hue phirte haiñ ham hijr-nasīb

jāñ-sipārī kā bhī kyā ḳhuub natīja niklā

dil meñ uThte rahe yādoñ ke bagūle 'tishna'

mujh meñ simTā huā ik dard kā sahrā niklā

aaina-KHana bhi andoh-e-tamanna nikla

ghaur se dekha to apna hi tamasha nikla

zindagi mahfil-e-shab ki thi pas-andaz-e-sharab

pine baiThe to bas ek ghunT zara sa nikla

phir chala mausam-e-wahshat mein sar-e-maqtal-e-ishq

qura-e-fal mere nam dobara nikla

dad-e-shaistagi-e-gham ki tawaqqo be-sud

dil bhi kam-baKHt taraf-dar usi ka nikla

hai ajab tarz ka rahraw dil-e-shorida-qadam

jab bhi nikla safar-e-ishq pe tanha nikla

wo raqibon ka pata puchhne aae mere ghar

koi to un se mulaqat ka rasta nikla

dar-ba-dar KHwar hue phirte hain hum hijr-nasib

jaan-sipari ka bhi kya KHub natija nikla

dil mein uThte rahe yaadon ke bagule 'tishna'

mujh mein simTa hua ek dard ka sahra nikla