aaina tabdil karne se bhi kya ho jaega

aa.ina tabdīl karne se bhī kyā ho jā.egā

aap jaise haiñ vahī to aa.ina dikhlā.egā

apnī sīrat ko nikhāreñge to auroñ ke liye

aap kā kirdār misl-e-ā.ina ho jā.egā

fikr-e-ā.inda meñ ghul kar kyoñ 'abas ham jaan deñ

dekh leñge aane vaalā kal jo din dikhlā.egā

‘ālam-vāraftagī hai aur safar bhī farz hai

dam kahāñ lenā hai chhālā paañv kā batlā.egā

mast rahte haiñ ḳhudī meñ apnī ai shāh-e-zamāñ

ham faqīroñ se jo uljhegā to muñh kī khā.egā

zāhir-o-bātin hamārā ek hai ham kyā kareñ

jo hamāre dil meñ hogā vo zabāñ par aa.egā

diid ke pyāse tire sāhil pe haiñ is aas meñ

dekhiye ab bahr-e-ulfat josh meñ kab aa.egā

kyā mudāvā kījiye 'maz.har' ġham-e-hijrāñ kā ab

ye to vo āzār hai jo saath le kar jā.egā

aaina tabdil karne se bhi kya ho jaega

aap jaise hain wahi to aaina dikhlaega

apni sirat ko nikhaarenge to auron ke liye

aap ka kirdar misl-e-aina ho jaega

fikr-e-ainda mein ghul kar kyon 'abas hum jaan den

dekh lenge aane wala kal jo din dikhlaega

‘alam-waraftagi hai aur safar bhi farz hai

dam kahan lena hai chhaala panw ka batlaega

mast rahte hain KHudi mein apni ai shah-e-zaman

hum faqiron se jo uljhega to munh ki khaega

zahir-o-baatin hamara ek hai hum kya karen

jo hamare dil mein hoga wo zaban par aaega

did ke pyase tere sahil pe hain is aas mein

dekhiye ab bahr-e-ulfat josh mein kab aaega

kya mudawa kijiye 'mazhar' gham-e-hijran ka ab

ye to wo aazar hai jo sath le kar jaega