aaj aae hain kal jaana hai phir ishq ko ruswa kaun kare

aaj aa.e haiñ kal jaanā hai phir ishq ko rusvā kaun kare

do-roza duniyā hai ye to duniyā kī tamannā kaun kare

majbūr nahīñ muḳhtār sahī ḳhuddārī ko rusvā kaun kare

jab maut hī māñge se na milī jiine kī tamannā kaun kare

us lazzat-e-ġham kā kyā kahnā vo yaad to aate rahte haiñ

ġham dene vaale ke sadqe ab ġham kā mudāvā kaun kare

bar aa.e tamannā jab na koī phir aisī tamannā se hāsil

go dil kā taqāza laakh sahī tauhīn-e-tamannā kaun kare

hoñToñ pe hañsī āñkhoñ meñ namī māthe pe shikan bal abrū meñ

allāh rī tarz-e-pursish-e-ġham ab ġham kā shikva kaun kare

maḳhmūr fazā mastāna ghaTā sāġhar kī khanak ġhunchoñ kī chaTak

ab aise mausam meñ saaqī andesha-e-fardā kaun kare

kyoñ apne nasheman ko ḳhud hī ab aag lagā deñ ham na 'sa.īd'

bijlī kī shikāyat kaun kare āñdhī kā shikva kaun kare

aaj aae hain kal jaana hai phir ishq ko ruswa kaun kare

do-roza duniya hai ye to duniya ki tamanna kaun kare

majbur nahin muKHtar sahi KHuddari ko ruswa kaun kare

jab maut hi mange se na mili jine ki tamanna kaun kare

us lazzat-e-gham ka kya kahna wo yaad to aate rahte hain

gham dene wale ke sadqe ab gham ka mudawa kaun kare

bar aae tamanna jab na koi phir aisi tamanna se hasil

go dil ka taqaza lakh sahi tauhin-e-tamanna kaun kare

honTon pe hansi aankhon mein nami mathe pe shikan bal abru mein

allah ri tarz-e-pursish-e-gham ab gham ka shikwa kaun kare

maKHmur faza mastana ghaTa saghar ki khanak ghunchon ki chaTak

ab aise mausam mein saqi andesha-e-farda kaun kare

kyon apne nasheman ko KHud hi ab aag laga den hum na 'said'

bijli ki shikayat kaun kare aandhi ka shikwa kaun kare